Miðjarðarhafsloftslagið ... þar sem sólin skín að meðaltali um 300 daga árlega. Þegar sumarið er fram undan getur mann ekki annað en dreymt um Suður-Frakkland, þar sem eru sólríkar strendur, krúttleg kaffihús og veitingastaðir, flóamarkaðir og fallegar byggingar. Þetta svæði er eftirsóttur staður að heimsækja vegna fjölbreytileika síns, lavander-akra, höfuðborgar ilmvatnsiðnaðarins, vínekra og gönguferða.

Svæðið býður upp á fjölbreytt landslag þar sem Miðjarðarhafsströndin mætir gróðursælum sveitasjarma, stórkostlegum og fallegum fjöllum, þar sem útsýnið nær alla leið til Alpanna.

Þorpin í klettunum og hæðunum mynda skemmtilegan rytma og efniviðurinn í húsunum blandast fallega við gróðurinn og háu trén allt um kring. Svæðið býður auðvitað upp á fjölbreytt úrval eigna, allt frá sögufrægum steinbæjum til glæsilegra villa. Byggingarlistin í Suður-Frakklandi er fjölbreytt og mótast mikið af Miðjarðarhafsloftslaginu, fallegu og litríku landslagi meðfram Miðjarðarhafsströndinni, þar sem er að finna líka fornar rómverskar rústir.

Ef við tölum um innanhússstílinn á heimilum á þessu svæði þá eru þau undir áhrifum frá aldagamalli byggingarlist og eftirsótt fyrir þægilegt og fagurt umhverfi. Hvort sem þú ert á Rivíerunni, í Provence eða í sveitum Occitanie er stíllinn tímalaus, stílhreinn og sjarmi fortíðarinnar rennur saman. Híbýlin eru þekkt fyrir látlausa og afslappandi stemningu, heillandi smáatriði og mildir litir fá að njóta sín með léttum og gegnsæjum efnum svo sólarljósið nái að skína sem best inn. Mörg hús á þessu svæði eru steinhlaðin með þykkum veggjum sem heldur húsunum kaldari á sumrin. Mikil áhersla er lögð á huggulegt útisvæði og að flæðið sé gott milli inni- og útirýmis.

Flísar og viðargólf eru klassísk gólfefni á þessu svæði og vinsælt að nota ljósbrúnar eða terracotta flísar, oft reynt að halda í gamla tímann og efniviðnum leyft að eldast fallega bæði á gólfi og veggjum. Grófir og hlaðnir veggir með upprunalegum loftbitum er ómissandi partur á mörgum heimilum, loftin þá yfirleitt máluð …