Bragi Þór Jósefsson ljósmyndari er reynslubolti á sínu sviði en hann hefur starfað við ljósmyndun í áratugi. Hann segir að ef mikil skipulagning er á bak við fyrirhugað brúðkaup sé best að tilvonandi brúðhjón fái fagaðila til að hjálpa þeim við að skipuleggja bæði brúðkaupið og brúðkaupsveisluna. „Fólk sem er að fara að gifta sig þarf að slaka á og njóta. Mér finnst það vera mikilvægt.“

Það þarf til dæmis að panta brúðkaupsmyndatökuna með góðum fyrirvara og nefnir Bragi Þór að það ætti að gera með allavega hálfs árs fyrirvara þótt það sé allur gangur á því. „Ég held að það sé lágmark. Það er ekki þar með sagt að það sé vonlaust að fá tíma með minni fyrirvara, svo sem mánuði áður, en til að vera viss er betra að fara að huga að þessu í kringum áramótin ef brúðkaupið verður að sumri til.“

Bragi Þór, sem almennt tekur brúðkaupsmyndir úti í náttúrunni, reynir að hitta tilvonandi brúðhjón fyrir brúðkaupsdaginn og ræða þau meðal annars hvert eigi að fara til að mynda.

„Það er enginn að láta mynda sig í stúdíói í dag; ég veit ekki til þess. Það er alveg búið sem betur fer og ég hef ekki séð stúdíóbrúðkaupsmyndir í að minnsta kosti tíu ár. Allar svona myndir eru teknar til dæmis í kirkjunni, úti í garði eða úti í náttúrunni.“

Stundum vill fólk láta mynda sig þegar það hefur sig til fyrir brúðkaupið, svo sem þegar brúðurin er að fara í brúðarkjólinn og setur á sig skartið. „Ég er sjálfur ekkert spenntur fyrir þannig myndatökum en sumir vilja það og það er allt í lagi. En …