Ég var fimmtán ára þegar foreldrar mínir byggðu sér sumarhús við Meðalfellsvatn. Við tókum strax ástfóstri við staðinn og þetta varð okkar fjölskylduparadís. Við systkinin erum fjögur og tvö okkar ákváðum að byggja okkur hús hvort sínum megin við foreldra okkar. Börn okkar og barnabörn elska staðinn þar sem allir finna eitthvað við sitt hæfi. Vatnið, fjöllin og fossar eru alltaf aðdráttarafl. Ég notaði fossinn sem sturtu á mínum unglingsárum og mínir afkomendur elska ískaldan fossinn. Vatnið er spennandi og alltaf einhver veiði, dóttir okkar veiddi maríulaxinn sinn níu ára í Meðalfellsvatni.

Hvernig myndirðu lýsa stílnum á bústaðnum?

Ég er með mjög blandaðan stíl, vil hafa hvítt og dökkt sem er eiginlega blanda af skandinavískum stíl og frönskum sveitastíl. Ég hef fundið tvær verslanir hér á landi sem ég hef verslað mikið við í gegnum árin. Eitt af mínum aðaláhugamálum er að fara á nytjamarkaði erlendis og ég læt engan fara fram hjá mér. Ég á það mikið af skrautmunum að ég skipti út eftir árstíðum.

Hvaðan færðu innblástur þegar þú ert að breyta og bæta bústaðinn?

Ég elska að nota það sem til er, breyta og bæta. Ekki það að það sé út af sparnaði heldur frekar það að ég þarf alltaf að vera að skapa. Mér er sagt að vogin sé þannig. Hillurnar á baðinu eru af fyrsta grillinu okkar en eftir nýjustu endurbæturnar er minna af mínum gjörningum sjáanlegir. Allar gardínur og rúmteppi hef ég fengið frá dásamlegum handverkskonum á Grikklandi. Það er að verða síðasti séns að versla slíkt þar, þar sem ungar konur eru ekki lengur að sitja við handverk.

Hefurðu alltaf haft áhuga á því sem viðkemur heimilinu og bústaðnum?

Ég hef alltaf haft áhuga á fallegum hlutum og þar kemur áhuginn á því að …