Vikumatseðill

Með því að skipuleggja matarinnkaup fyrir vikuna, jafnvel mánuðinn, minnkar þú útgjöldin töluvert. Reyndu að takmarka búðarferðir við eina í viku og kauptu inn allt sem þarf samkvæmt vikumatseðlinum. Þannig forðastu óþarfa kaup, nýtir matinn betur og sparar tíma.

Ofnahreinsun

Splæstu í Oven Pride frá Bónus og leyfðu hreinsiefninu að vinna sína töfra á óhreinindi bakaraofnsins. Þetta er betri leið en sjálfhreinsandi ofn og kostar ekki mikið!

Taktu til eins og óvæntur gestur sé á leiðinni í heimsókn

Heimilið getur orðið ótrúlega hreint á mettíma þegar einhver hringir og segir „ég er á leiðinni!“ Notaðu þessa orku, jafnvel þótt enginn sé á leiðinni í heimsókn. Gríptu körfu, hentu öllu sem er ekki á sínum stað í hana, feldu hana og ekki gleyma að ryksuga og þurrka af bara þar sem fólk sér!

Heimagert ediksprey

Ekki eyða peningum í dýrar og óumhverfisvænar hreinsivörur þegar þú getur búið til þína eigin. Blandaðu 1 dl af ediki í IKEA úðabrúsa, fylltu restina með vatni og voilá! Fjölnota hreinsisprey sem ég nota á nánast allt. Ódýrt og umhverfisvænt.

15 mínútna hraðatiltektin

Ef ráð nr. 3 virkar ekki, prufaðu þá að stilla klukkuna á 15 mínútur, setja tónlistina í botn og þrífa eins mikið og þú getur. Þú trúir því ekki hvað það er hægt að ná miklu á þessum stutta tíma. Gleðileg þrif! Eða, að minnsta kosti, sneggri þrif!