Sex hæða nútímalegt fjölbýlishús. Hvít Tesla ekur upp að húsinu og út úr bílnum stígur maður í hvítum fötum. Hann gengur inn í húsið og nokkrum mínútum síðar fer blaðamaður sömu leið, vildi leyfa manninum að komast allavega inn til sín.

Bjart er yfir íbúðinni eins og yfir Guðmundi Birki Pálmasyni sem fleiri kannast við sem Gumma kíró. Hann er hlýlegur við fyrstu kynni. Eins og einhver ró sé yfir honum.

Hann býður til sætis í ljósum sófa í stofunni. Hvítt marmaraborð er við sófann. Arco-lampinn frægi frá Flos eins og svífur yfir okkur þar sem hann stendur á hvítum marmarastalli. Á móti er Eames-húsbóndastóllinn frægi sem naut sín í framhaldsþáttunum um sálfræðinginn Frasier Crane sem varð fyrst vinsæll í þáttunum Staupasteinn, Cheers.

Við ætlum að tala um hitt og þetta, og meira um íbúðina síðar.

Úr borg í sveitasamfélag

Guðmundur fæddist á Ísafirði og fjölskyldan bjó um tíma í Bolungarvík, á Selfossi, í Reykjavík og loks Danmörku í þrjú ár. Í lok þeirrar dvalar fékk faðir hans boð um að gerast kaupfélagsstjóri á Hornafirði og flutti fjölskyldan þangað. „Það var mikið stökk að fara úr borgarmenningunni í svona lítið sveitasamfélag. Ég fór úr því að vera að leika mér á hjólabretti og BMX-hjóli í að sjá stráka á mínum aldri vera að draga á eftir sér leikfangabíla.“

Náttúran allt í kring hafi mótað hann sem persónu og listamann, en hann málaði lengi málverk sem hann seldi. „Málverkin mín endurspegla landslagið þar, sem er stórbrotið. Fimm skriðjöklar sjást út um eldhúsgluggann hjá mömmu og pabba. Það er …